‘पत्रकारितामा एआईको उपयोग’ विषयक तीनदिने कार्यशाला सम्पन्न

ललितपुर । कृत्रिम बौद्धिकता (एआई) को द्रुत विकाससँगै बदलिँदो सञ्चार परिदृश्यमा पत्रकारहरूलाई प्रविधिमैत्री, सिर्जनशील र व्यावसायिक रूपमा प्रतिस्पर्धी बनाउने उद्देश्यले ललितपुरमा आयोजित तीनदिने विशेष कार्यशाला आज सम्पन्न भएको छ ।

सञ्चार रजिस्ट्रार कार्यालय, बागमती प्रदेशको आयोजनामा ललितपुरको जावलाखेलमा सञ्चालित ‘पत्रकारितामा एआईको उपयोग’ विषयक उक्त कार्यशालामा बागमती प्रदेशका विभिन्न जिल्लामा कार्यरत २५ भन्दा बढी क्रियाशील सञ्चारकर्मीहरूको सहभागिता रहेको थियो ।


​डिजिटल प्रविधिले विश्वभरकै पत्रकारिताको परम्परागत स्वरूप र कार्यशैली फेरिरहेका बेला नेपाली समाचार कक्षलाई पनि समयसापेक्ष रूपान्तरण गर्दै अझ छिटो, तथ्यपरक, खोजमूलक र विश्वसनीय बनाउने व्यावहारिक सीप सिकाउनका लागि यो कार्यशाला आयोजना गरिएको हो ।

तीन दिनसम्म चलेको प्रशिक्षणमा सहभागी पत्रकारहरूलाई समाचार लेखन, सम्पादन, तथ्य जाँच (फ्याक्ट चेकिङ), डेटा पत्रकारिता, अडियो–भिडियो तथा मल्टिमिडिया सामग्री उत्पादनमा विभिन्न एआई औजारहरूको प्रभावकारी र सुरक्षित प्रयोग गर्ने तरिकाबारे सैद्धान्तिक तथा प्रयोगात्मक अभ्यास गराइएको थियो । यसका साथै, एआईको प्रयोग गर्दा ध्यान दिनुपर्ने पत्रकार आचारसंहिता, प्रतिलिपि अधिकार (कपिराइट) र गोपनीयताका विषयमा समेत गहन छलफल गरिएको थियो ।


​कार्यशालाको समापन समारोहलाई सम्बोधन गर्दै बागमती प्रदेश आन्तरिक मामिला, कानुन तथा सहकारी मन्त्रालयका सचिव महेश भट्टराईले आधुनिक प्रविधिको उच्चतम प्रयोगसँगै पत्रकारिताको आधारभूत गुणस्तर, नैतिकता र विश्वसनीयता कायम राख्नु आजको मुख्य चुनौती र आवश्यकता रहेको बताए । प्रविधिले कामलाई सहज बनाए पनि समाचारको सत्यता जाँच्ने अन्तिम जिम्मेवारी पत्रकारकै हुनेमा समेत उनले जोड दिए ।


​ कार्यक्रममा बोल्दै बागमती प्रदेशका सञ्चार रजिस्ट्रार रेवती सापकोटाले प्रविधिलाई पत्रकारको विकल्पका रूपमा नभई एक सशक्त सहयोगी औजारका रूपमा लिनुपर्ने बताए । एआईको सही सदुपयोग गर्न सके पत्रकारहरूले नियमित र प्राविधिक काममा लाग्ने समय बचाएर गहन खोज पत्रकारितामा ध्यान केन्द्रित गर्न सक्ने उनको भनाइ थियो ।

कार्यशालामा सिकेका ज्ञान र सीपलाई आ–आफ्नो कार्यक्षेत्र र समाचार कक्षमा व्यवहारिक रूपमा लागू गर्न समेत आयोजकले सहभागीहरूलाई आग्रह गरेको छ ।