काठमाडौं । नेपाली कांग्रेसले चुनावी अभियान मधेशबाट सुरु गर्ने भएको छ । पार्टीले माघ १६ गते जनकपुरमा प्रदेशस्तरीय बृहत् सभा आयोजना गरेर चुनावी अभियानको औपचारिक सुरुवात गर्ने तयारी गरेको हो ।
जनकपुरमा हुने सभालाई सभापति गगन थापा, उपसभापति विश्वप्रकाश शर्मा लगायत शीर्ष नेताहरूले सम्बोधन गर्ने कार्यक्रम छ । पार्टीले उपसभापति शर्मालाई चुनावी प्रचार-प्रसार समितिको संयोजकको जिम्मेवारी दिएको छ ।
सभाको तयारी तथा समन्वय केन्द्रीय तहबाट उपसभापति शर्माले गर्ने भएका छन् । मधेश प्रदेशमा हुने तयारीका विषयमा प्रदेश समिति स्तरमा छलफल हुन लागेको छ ।
मधेशका प्रचार संयोजक नितेशकुमार गुप्ताका अनुसार सभाको तयारीका लागि शनिबार प्रदेश समितिको बैठक बस्ने तय भएको छ । ‘प्रचार प्रसारलाई तयारीका लागि प्रदेश समितिको आज बैठक बस्दैछ,’ गुप्ताले भने, ‘माघ १६ गते हुने बृहत् सभामा लाखौँ मान्छे सहभागी हुन्छन्।’
कांग्रेस सभापति थापा सर्लाही-४ बाट उम्मेदवार बनेका छन् । यस पटकको निर्वाचनमा विभिन्न दलहरूले मधेशलाई केन्द्र बनाएर चुनावी गतिविधि तीव्र बनाएका छन् ।
यसअघि जनकपुरमा राष्ट्रिय स्वतन्त्र पार्टी (रास्वपा) ले पनि चुनावी सभा आयोजना गरेको थियो ।
प्रतिक्रिया