तुइन खोलाको पहिरो पन्छाउन अझै दुइ दिन लाग्ने

चितवन । नारायणगढ–मुग्लिन सडकखण्डको तुइन खोलामा खसेको पहिरो पन्छाउन दुई दिन लाग्ने जनाइएको छ। हिजो दिउँसो ४ः३० बजे खसेको पहिरो आज बिहानबाट पन्छाउन सुरु गरिएको छ ।

डिभिजन सडक कार्यालय भरतपुरका प्रमुख नारायण लामिछानेका अनुसार पहिरो पन्छाउन दुई वटा लोडर, एउटा स्काभेटर र एउटा भ्याकुलोडर परिचालन गरिएको छ। दमौलीबाट अर्को एउटा स्काभेटर मगाइएको छ।

सडकको १६० मिटर भाग पहिरोले ढाकिएको छ। पहिरोको तस्बिर हेर्दामाथिबाट अरु थप ठूलो पहिरो झर्ने सम्भावना कम भए तापनि माथिबाट झर्न बाँकी केही ढुङ्गाहरू पूर्ण रुपमा झरिनसकेकाले अझै साना तथा मझौला पहिरो खस्न सक्ने सम्भावना रहेको लामिछानेले बताए।

सो ठाउँमा गत शुक्रबारदेखि निरन्तर पहिरो खसिरहेको छ। समय समयमा पहिरो पन्छाएर केही सवारी आवागमन गराइएको भए पनि मङ्गलबार साँझबाट ठप्प भएको छ। सडक रोकिएसँगै ठूलो संख्यामा सवारीसाधन लाममा छन्। यात्रुवाहक सवारीसाधन भने फर्काएर वैकल्पिक मार्गतर्फ लागेका छन्। मालवाहक सवारीसाधन लाममा छन्।