जसपाले सरकारलाई दिएकाे समर्थन फिर्ता लिदै

काठमाडौं । जनता समाजवादी पार्टी(जसपा) नेपालले केपी ओली नेतृत्वको सरकारलाई दिएको समर्थन आज फिर्ता लिने भएको छ । आज बस्ने संसदीय दलको बैठकले औपचारिक रूपमा सरकारलाई दिएको समर्थन फिर्ता लिने भएको हो ।

प्रचार विभाग प्रमुख पूर्ण बस्नेतले पार्टीको केन्द्रीय कार्यकारिणी समितिको बैठकले सरकारलाई दिएको समर्थनबारे निर्णय गर्न पार्टी संसदीय दललाई निर्देशन दिएको र आज बस्ने दलको बैठकले यसबारे औपचारिक निर्णय गर्ने जानकारी दिए ।

समर्थन फिर्ता लिने एजेन्डा तय गरेरै बैठक बस्न लागेको उनले बताए । जसपा नेपालले लुम्बिनी प्रदेश सरकारलाई दिएको समर्थन फिर्ता लिइसकेको छ । कांग्रेस–एमाले गठबन्धन सरकारले कुनै क्षेत्रमा पनि सन्तोषजनक नतिजा दिन नसकेको जसपाले निष्कर्ष निकालेको छ ।