काठमाडौं । पोर्चुगलका स्टार फुटबलर क्रिस्टियानो रोनाल्डोले अन्तर्राष्ट्रिय फुटबलबाट सन्यासको घोषणा गरेका छन् ।
४१ वर्षीय रोनाल्डोको यो निर्णयसँगै पोर्चुगलका लागि खेलेको उनको कीर्तिमानी २३ वर्षे अन्तर्राष्ट्रिय करिअर समाप्त भएको छ ।
बिहीबार सन्यास घोषणा गरेका रोनाल्डोको निर्णय प्रशिक्षक जर्ज जेसससँगको सार्वजनिक विवादपछि आएको हो ।
पछिल्ला केही सातादेखि उनको अन्तर्राष्ट्रिय फुटबल भविष्यलाई लिएर विभिन्न अड्कलबाजी भइरहेका थिए ।
सेप्टेम्बर ३० मा डेनमार्कविरुद्धको युईएफए नेसन्स लिग खेलको तयारीका क्रममा रोनाल्डोले पोर्चुगलको प्रशिक्षण शिविर अचानक छाडेका थिए ।
प्रशिक्षक जेससले डेनमार्कविरुद्धको खेलमा उनलाई सुरुआती टोलीमा नराख्ने बताएपछि विवाद चर्किएको थियो ।
त्यसअघि सेप्टेम्बर २७ मा नर्वेविरुद्ध भएको २-१ को जितमा पनि रोनाल्डो बेन्चमै बसेका थिए । त्यसको तीन दिनअघि वेल्सविरुद्धको १-० को जितमा भने उनले टोलीको कप्तानी गरेका थिए ।
नर्वेविरुद्धको खेलमा चोट वा प्रतिबन्धबिना रोनाल्डो मैदानमा नउत्रिएको यो नोभेम्बर २०२४ यताकै पहिलो पटक थियो ।
प्रशिक्षक जेससले रोनाल्डोले चाहेमा राष्ट्रिय टोलीमा फर्किन सक्ने बताएका थिए । तर, रोनाल्डोले त्यसको केही दिनपछि प्रशिक्षकले आफूसँग गरेको सहमति दुई पटक तोडेको आरोप लगाएका थिए ।
रोनाल्डोका अनुसार शारीरिक फिटनेस व्यवस्थापनका लागि नर्वे र डेनमार्कविरुद्धका खेलमा आफूलाई नखेलाउने सहमति भएको थियो । तर, नर्वेविरुद्धको खेलका दिन प्रशिक्षकले उनलाई ३० मिनेट खेलाउने बताएका थिए ।
उनले मैदानमा खेल्नका लागि वार्मअप गरे पनि अन्तिम समयमा अवसर नपाएको बताएका थिए ।
त्यसपछि प्रशिक्षकसँग भएको निजी छलफल र सार्वजनिक अभिव्यक्तिबीच मेल नखाएको भन्दै रोनाल्डोले प्रशिक्षण शिविर छाड्ने निर्णय गरेको बताएका थिए ।
सन्यास घोषणाका क्रममा भने रोनाल्डोले प्रशिक्षकसँगको विवादलाई आफ्नो निर्णयको कारणका रूपमा उल्लेख गरेका छैनन् । उनले अन्तर्राष्ट्रिय फुटबलबाट बिदा लिने निर्णय सहज नभएको बताएका छन् ।
‘यो सजिलो निर्णय थिएन । किनकि केही निर्णय केवल दिमागले मात्र होइन, मुटुले पनि लिन्छ,’ रोनाल्डोले भनेका छन् ।
उनले समर्थकलाई धन्यवाद दिँदै आफ्नो कुनै गोलले कसैलाई खुसी बनाएको, चिन्ता भुलाएको वा देशप्रति गर्व महसुस गराएको भए आफ्नो यात्रा सार्थक भएको बताएका छन् ।
रोनाल्डोले सन् २०२६ को फिफा विश्वकपमा पनि कीर्तिमान बनाएका थिए । उनले लगातार छ संस्करणको विश्वकपमा खेल्ने र गोल गर्ने पहिलो खेलाडीको उपलब्धि हासिल गरेका थिए । उक्त विश्वकपमा उनले पोर्चुगलका लागि तीन गोल गरेका थिए ।
पोर्चुगल अन्तिम १६ बाट बाहिरिएपछि उनले विश्वकपमा आफ्नो यात्रा समाप्त भएको संकेत गरेका थिए ।
‘यसरी विश्वकपबाट बाहिरिनुपर्दा दुःखी छु । मैले आफ्नो तर्फबाट सक्दो प्रयास गरेँ । यो मेरो अन्तिम विश्वकप थियो,’ उनले त्यसबेला भनेका थिए ।
प्रतिक्रिया