गोरखामा खेर गइरहेको बाँझो जमिनमा व्यवसायिक ओखरखेती

गोरखा । गोरखाको बारपाक सुलिकोट गाउँपालिकामा वर्षौँदेखि बाँझो रहेको ५ सय रोपनी जमिनमा व्यावसायिक ओखरखेतीको शुरुआत गरिएको छ। किसानको आर्थिक आयआर्जन बृद्धि गर्नका लागि सुलिकोट ३ स्वाँरा र ४ को सौरपानीमा अनुदान कार्यक्रममार्फत ओखरखेती सुरु गरिएको गाउँपालिका कृषि शाखाका प्रमुख सन्तोष ढकालले जानकारी दिए।

“करिब २ हजार २ सय मिटरको उचाईमा रहेको ती दुई क्षेत्रमा जग्गा भएका किसानलाई समेटेर कागतेखर्क बहुउद्देशीय कृषक समूह गठन गरिएको छ,” उनहाँले भने, “सोही समूहमा आवद्ध किसानलाई प्राविधिकको सुझावअनुसार जसको जमिनमा जति वटा बेर्ना लगाउन मिल्छ, सोही अनुसार बेर्ना अनुदानमा उपलब्ध गराइएको हो।”

मुख्यमन्त्री नवप्रर्वद्धन कार्यक्रम र गाउँपालिकाको लागत साझेदारीमा किसानलाई २ हजार २ सय ओखरका बेर्ना वितरण गरिएको उनले बताए। गाउँपालिकाले नै जुम्लाबाट कलमी गरिएको ओखरका विरुवा खरिद गरेर ल्याई किसानलाई वितरण गरेको हो। ओखर खेतीका लागि छनोट गरिएको जग्गामा चारवटा ‘प्लट’ बनाएर बेर्ना लगाउन थालिएको उनको भनाई छ।

किसानलाई वितरण गरिएका बेर्ना प्रत्येक १० मिटरको फरकमा खाडल खनेर आवश्यक मलखादको व्यवस्था गरी किसानहरूले रोप्न सुरु गरिसकेका छन्। अहिले लगाइएको विरुवाले करिब चार वर्षपछि उत्पादन दिन सुरु गर्ने उनले बताए।

“कृषि प्राविधिकसहितको टोलीले माटो परीक्षण गर्दा ती क्षेत्र ओखर खेतीका लागि अत्यन्तै उपयुक्त रहेको पाइयो,” उनले भने, “भिरालो, पानी नजम्ने जमिन र त्यहाँको हावापानी पनि ओखर खेतीका लागि सुहाउदो भएकाले यस वर्षदेखि ओखर खेतीको थालनी गरिएको हो।”

ओखरका विरुवा खरिदका लागि रु १० लाख र ढुवानीका लागि मात्र एक लाख रुपैया भन्दा बढी खर्च भएको उनले बताए।