काठमाडौँ । परराष्ट्रमन्त्री शिशिर खनाल चिनियाँ समकक्षी वाङ यीको निमन्त्रणामा चार दिने औपचारिक भ्रमणका लागि आज चीन प्रस्थान गर्दै छन्। बालेन्द्र शाहको नेतृत्वमा राष्ट्रिय स्वतन्त्र पार्टी (रास्वपा) को नयाँ सरकार गठन भएपछि परराष्ट्रमन्त्री खनालबाट हुन लागेको यो पहिलो चीन भ्रमण हो।
गत साता मात्रै भारतको भ्रमण सम्पन्न गरेर फर्किएका मन्त्री खनालको यो बेइजिङ यात्रालाई दुई विशाल छिमेकी मुलुक भारत र चीनबीच सन्तुलित सम्बन्ध कायम राख्ने नेपालको कूटनीतिक प्रयासका रूपमा अर्थपूर्ण रूपमा हेरिएको छ। चीन भ्रमणको तालिका पहिले नै निश्चित गरेर मात्र उनी नयाँ दिल्ली गएको चर्चा राजनीतिक वृत्तमा चलिरहँदा मन्त्री खनालले भारतमा समकक्षी एस जयशंकरसहित त्यहाँका उच्च अधिकारीहरूसँग भेटवार्ता गरेका थिए।
जुन १४ देखि १७ सम्म बेइजिङमा रहँदा मन्त्री खनालले आफ्ना चिनियाँ समकक्षी वाङ यीसँग द्विपक्षीय वार्ता गर्ने तय भएको छ, जहाँ नेपाल र चीनबीचको सम्बन्धलाई थप सुदृढ बनाउनुका साथै पारस्परिक हित र सहयोगलाई अघि बढाउने विषयमा गहन छलफल हुने परराष्ट्र मन्त्रालयले जनाएको छ। भ्रमणका क्रममा उनले चिनियाँ कम्युनिष्ट पार्टी (सीपीसी) का शीर्ष नेताहरू तथा चीन सरकारका अन्य उच्च पदस्थ अधिकारीहरूसँग पनि छुट्टाछुट्टै भेटवार्ता गर्ने तालिका रहेको छ।
राजनीतिक संवादका अतिरिक्त मन्त्री खनालले बेइजिङस्थित नेपाली दूतावासद्वारा आयोजित वैदेशिक लगानी प्रवर्द्धन सम्बन्धी सम्मेलनलाई सम्बोधन गर्नुका साथै चिनियाँ व्यवसायीहरूसँग नेपालमा लगानी भित्र्याउने विषयमा विशेष अन्तरक्रिया समेत गर्नेछन्। नेपाली दूतावासले आयोजना गर्ने सम्मान कार्यक्रममा सहभागी भई उनी जुन १७ मा स्वदेश फर्किने छन्।
प्रतिक्रिया