५१ डलर दान गर्दा १२ वर्ष जेल सजाय !

मस्को । रुसको एक अदालतले युक्रेनलाई समर्थन गर्ने संस्थालाई ५१ अमेरिकी डलर ९आजको मूल्यअनुसार ६ हजार ८४९ रुपैयाँ० दान गरेको आरोपमा एक महिलालाई १२ वर्ष जेल सजाय सुनाएको छ । ‘देशद्रोह’ गरेको ठहर गर्दै ३३ वर्षीया क्सेनिया क्यारेलिनालाई उक्त जेल सजाय सुनाइएको हो ।

अमेरिकी र रुसी नागरिकता बोक्ने क्यारेलिनाले गत हप्ता बन्द इजलासमा गरिएको सुनुवाइमा आफ्नो गल्ती स्वीकार गरेकी थिइन् । अमेरिकाको लस एन्जलिसमा बस्दै आएकी उनले सन् २०२१ मा त्यहाँको नागरिकता लिएकी थिइन् ।

गत जनवरीमा परिवारलाई भेट्न रुस आएको बेला उनलाई पक्राउ गरिएको थियो । उनलाई राजधानी मस्कोबाट १ हजार ६०० किलोमिटर पूर्वमा रहेको येकाटेरिनबर्गबाट नियन्त्रणमा लिइएको थियो ।

अभियोजकहरुले उनलाई १५ वर्ष जेल सजाय हुनुपर्ने माग गरे पनि येकाटेरिनबर्ग अदालतले उनलाई १२ वर्षको सजाय सुनाएको थियो । उनीमाथि युक्रेनको सेनालाई हतियार उपलब्ध गर्ने युक्रेनी संस्थाका लागि रकम उठाउन मद्दत गरेको आरोप लगाइएको थियो ।

यता, रुसी मानवअधिकारीवादीहरुले क्यारेलिनाले अमेरिकामा रहँदा २२ फेब्रुअरी, २०२२ मा एकपटक मात्र ५१।८० अमेरिकी डलर ट्रान्सफर गरेको दाबी गरेका छन् । यो रुसले युक्रेनमा सैन्य कारबाही सुरु गरेको पहिलो दिन थियो । रुसी अधिकारीहरूले उनको फोनबाट यो तथ्य पत्ता लगाएको हुनसक्ने आङ्कलन गरिएको छ ।

क्यारेलिनाका वकिलले भने उनले दुवै पक्षका पीडितहरूलाई सहयोग पुग्छ भन्ने आशामा दान गरेको बताएका छन् । क्यारेलिनाले यस सजायविरुद्ध पुनरावेदन गर्ने पनि उनले बताए ।

क्यारेलिनाले सहयोग गरेको ‘राजोम फर युक्रेन’ नामक संस्थाले यसअघि उनी पक्राउ परेको घटनाले आफूहरू स्तब्ध भएको बताएको थियो । आफूहरुले हतियार खरिदका लागि रकम जम्मा नगरेको र यो मानवीय सहायताका लागि भएको संस्थाले दाबी गरेको थियो ।

बीबीसीबाट