कोटेश्वरबाट ब्राउन सुगरसहित आठ जना समातिए

काठमाडौ । काठमाडौको कोटेश्वरबाट प्रतिबन्धित लागूऔषध ब्राउन सुगरसहित आठ जनालाई प्रहरीले पक्राउ गरेको छ । काठमाडौं महानगरपालिका–३२ कोटेश्वरमा शङ्कास्पद गतिविधि गरिरहेको अवस्थामा खानतलासी गर्दा उनीहरुको साथबाट ३३.७६ ग्राम ब्राउन सुगर प्रहरीले बरामद गरेको हो।

पक्राउ पर्नेमा ललितपुरका २७ वर्षीय रफिस अवाले, काभ्रेपलाञ्चोक नमोबुद्धका १९ वर्षीय रिसफ श्रेष्ठ, मोरङ कानेपोखरीका २१ वर्षीय रेमन राई, बेलबारीका ३३ वर्षीय अमितकुमार चौधरी र ३६ वर्षीय प्रमोद राई, पाँचथरको मिक्लाजुङका २८ वर्षीय मेहरमान भुजेल र फिदिमका २७ वर्षीय टिम्पल तामाङ, फाल्गुनन्दका २९ वर्षीय भीमकुमार चेम्जोङ रहेका छन् । जिल्ला प्रहरी परिसर काठमाडौँको अनुसार उनीहरुको साथबाट लागुऔषध ट्रामाडोल आठ ट्याब्लेट, मोटरसाइकल र स्कुटर एक(एक थान, नगद रु ५५ हजार दुई सय, १४ थान मोबाइल, आइप्याड एक थान, झोला एक थान, तौल गर्ने डिजिटल मेसिन एक थान र पर्स एक थान बरामद गरेको छ।