सुनसरीमा दम्पतीको शव भेटियो, घटनाको सम्बन्धमा प्रहरीले अनुसन्धान गर्दै

काठमाडौं । सुनसरीको इनरुवामा दम्पती घरभित्रै मृत फेला परेको घटनामा प्रहरीले अनुसन्धान थालेको छ । इनरुवा नगरपालिका–९ बबियाका ३५ वर्षीय सुकदेव शर्मा र उनकी पत्नी अन्दाजी २३ वर्षीया सवेता खातुन घरभित्रै मृत फेला परेका थिए ।

सुकदेवको शव अर्ध नग्न अवस्थामा फुसको घरको धुरीमा सारीको पासो लगाएर झुन्डिएको अवस्थामा र सवेताको शव ओछ्यानमा सुतिरहेको अवस्थामा फेला परेको सुनसरी प्रहरी प्रमुख सुमनकुमार तिम्सिनाले जानकारी दिए ।

आज बिहान करिब ९ बजेतिर स्थानीयले घरभित्र दम्पतीलाई मृत देखेपछि प्रहरीलाई खबर गरेका थिए । घटना शंकास्पद भएकाले अनुसन्धान भइरहेको सुनसरी प्रहरीले जनाएको छ ।