काठमाडौं । जनमत पार्टीको जनवर्गीय संगठन नेपाल युवा संगठनको केन्द्रीय महामन्त्रीमा रोशन सिंह राजपुत मनोनित भएका छन्।
नेपाल युवा संगठनका केन्द्रीय अध्यक्ष निरञ्जन वर्माले राजपुतलाई संगठनको विधानअनुसार तदर्थ केन्द्रीय कार्यसमितिको महामन्त्री पदमा मनोनयन गरिएको जानकारी दिए। संगठनले राजपुतको सक्रियता, जिम्मेवारी र संगठनप्रतिको योगदानलाई ध्यानमा राख्दै महत्वपूर्ण जिम्मेवारी दिएको जनाएको छ।
अध्यक्ष वर्माद्वारा जारी मनोनयनसम्बन्धी पत्रमा संगठनको विचार, सिद्धान्त र उद्देश्यअनुरूप जिम्मेवारी निर्वाह गर्ने विश्वास व्यक्त गर्दै राजपुतलाई सफल कार्यकालको शुभकामना दिइएको छ।
महामन्त्रीको जिम्मेवारी पाएसँगै धनुषाका राजपुतले युवालाई संगठनमा थप सक्रिय बनाउने, संगठनको गतिविधिलाई प्रभावकारी बनाउने तथा जनमत पार्टीको युवा संगठनलाई थप सुदृढ बनाउन भूमिका खेल्ने बताएका छन् । धनुषाबाट युवा नेतृत्वका रूपमा अघि आएका राजपुतलाई केन्द्रीय तहको जिम्मेवारी दिइनुलाई जिल्लाका युवामाझ पनि महत्वका साथ हेरिएको छ।
नेपाल युवा संगठनले आगामी दिनमा युवाका मुद्दा, रोजगारी, शिक्षा, नेतृत्व विकास तथा सामाजिक गतिविधिमा आफ्नो भूमिका थप प्रभावकारी बनाउने उद्देश्य लिएको जनाएको छ।
प्रतिक्रिया