बुटवल । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले जेनजी आन्दोलनले कमजोरी सच्याएर अघि बढ्न प्रेरित गरेको बताएका छन्।
आज लुम्बिनी स्तरीय एकता सभालाई सम्बोधन गर्दै प्रचण्डले युवा पुस्ताको माग र जनताको अपेक्षाअनुसार पार्टीलाई बदल्नुपर्ने आवश्यकता आएको बताए। उनले भने, ‘जेनजी आन्दोलनले विगतमा आफूहरूले गरेको कामको समीक्षा गर्न दबाब बढाएको छ ।’
प्रचण्डले भने, ‘हामीले समीक्षा गरेरै एकताबद्ध बनेका हौँ । यो सन्देश सभाले आफ्नो कमीकमजोरी खोतल्ने र त्यसलाई सच्याउने प्रतिबद्धता जनाउन आएको हो । यो आत्मालोचना सभा पनि हो। हामी १५ वटा पार्टी एकताबद्ध भएर नेपाली कम्युनिस्ट पार्टी बनेका हौँ।’
उनले हजारौँ जेनजी युवाहरूले नेकपालाई अभिभावक मानेर पार्टीमा प्रवेश गरेको उल्लेख गर्दै आफूहरू बदलिएर जनताको सेवामा समर्पित भएर लाग्ने प्रतिबद्धता पनि व्यक्त गरे।
साथै, उनले चुनाव जितेर सत्तामा पुगे पनि हेलिकोप्टर चढेर भाग्नुपर्ने अवस्था आएको बताएका छन्। प्रचण्डले भने, ‘चुनाव जितेर मात्रै केही नाप्दो रहेनछ र हेलिकोप्टर चढेर भाग्नु पर्ने रहेछ। ठूलो कुरा जनताबीचको एकता आवश्यक रहेछ। मैले संसदको रोष्ट्रमबाटै भनेको थिएँ-बहुमतको दम्भ नदेखाउनुहोस्, नत्र जनताले लेखेट्ने छन्।’
उनले १५ वटा पार्टीबीच लामो छलफल र संकल्पबाट एकता भएको र जनताले उत्साहसाथ अनुमोदन गरेको बताए । साथै, भदौ २४ गतेको विध्वंसका घटनामा सिंहदरबार, सर्वोच्च अदालत र प्रहरी चौकी जलाइएको उदाहरण दिँदै राज्य संयन्त्र र सुरक्षा प्रणाली कमजोर रहेको बताए।
प्रचण्डले देश बनाउन वर्षौं संघर्ष र त्याग गरेका दलहरूको भूमिकालाई महत्त्वपूर्ण ठहर गर्दै २००६ सालदेखि जनआन्दोलनसम्मका सहिदहरूको बलिदानीले आजको परिवर्तन सम्भव भएको बताए। उनले आफैं माओवादी सर्वोच्च कमाण्डर रहँदा माधव नेपाल एमाले महासचिव भएको स्मरण गराउँदै वार्ता र सहकार्यका घटनाहरूको चर्चा गरे।
कार्यक्रममा सहसंयोजक माधवकुमार नेपालले पनि एमाले अध्यक्ष केपी शर्मा ओली लक्षित गर्दै वर्तमान राजनीतिक अभ्यासमा सुधार आवश्यक रहेको र केही पुराना पात्र सुधार्न नसकिने अवस्था आएको बताए ।
प्रतिक्रिया