काठमाडौं । नेपाल प्रहरीको केन्द्रीय अनुसन्धान ब्युरो (सीआईबी) को टोलीले संयुक्त राष्ट्रसंघीय सम्मेलनमा सहभागी हुन स्पेन पठाएको ट्राभल्समाथि छापा हानेको छ । सम्मेलनमा सहभागी हुने भन्दै नक्कली कागजात बनाएर कार्यक्रमका निम्ति स्पेन पठाएको ट्राभल्समा सीआईबीले छापा हानेको हो ।
काठमाडौंको महाराजगजस्थित भिजिट अबरोड टुर्स एन्ड ट्राभल्समा एक साताअघि छापा मारिएको सीआईबी स्रोतले जानकारी दिएको छ । स्पेनको सेभियामा असार १६ देखि १९ सम्म आयोजित सम्मेलनमा सहभागी नेपालीमध्ये केही उक्त ट्राभल्समार्फत गएका खुलेको छ । सम्मेलनमा सहभागी भएर उनीहरू नेपाल नर्फिएपछि मानव तस्करीको आशंकामा देशभित्र चर्को बहस भइरहेको छ ।
उक्त कार्यक्रममा सहभागी हुन प्रधानमन्त्री केपी शर्मा ओली समेत स्पेन पुगेका थिए । गृह मन्त्रालयले स्पेन प्रकरणबारे अनुसन्धान गर्न सीआईबीका एसएसपी होबिन्द्र बोगटीको नेतृत्वमा समिति बनाएको थियो । समितिले उक्त ट्राभल्समा छापामा मारेको हो ।
एसएसपी बोगटीले छापा मारेको नभनेर ट्राभल्सका केही कागजात र डिभाइस नियन्त्रणमा लिइएको जानकारी दिएका छन् । उनले भने, ‘छापा मारेको भन्ने नै त होइन, केही शंकास्पद लागेका कागजात र ल्यापटपहरू नियन्त्रणमा लिएका हौँ ।’ संसद्मा समेत यो विषयले प्रवेश पाएपछि एसएसपी बोगटीको नेतृत्वमा छानबिन समिति बनेको थियो । उक्त समितिले अहिले काम गरिरहेको छ ।
प्रतिक्रिया