मेलम्चीमा बाढी आउदा काठमाडौंमा खानेपानी बन्द

काठमाडौं । मेलम्चीमा वर्षाका कारण बाढी आएसँगै काठमाडौंमा पानी आपूर्ति बन्द भएको छ । मेलम्चीमा बाढी आएर पानी धमिलिन थालेपछि तत्कालका लागि काठमाडौंमा पानी वितरण बन्द गरिएको काठमाडौं उपत्यका खानेपानी लिमिटेड (केयूकेएल) ले जनाएको छ ।

केयूकेएलका प्रवक्ता प्रकाशकुमार राईले पानी धमिलो आएपछि काठमाडौंमा वितरण बन्द गरिएको जानकारी दिए ।

धमिलो पानीलाई फिल्टर गने क्यापासिटी ट्रिटमेन्ट प्लान नहुँदा पानी डाइभर्ट गर्नुपरेको र वर्षा रोकिएसँगै केहि दिनमा पानी पुनः वितरण सुरु गरिने केयूकेएलले जनाएको छ । मेलम्ची नदीमा पानीको बहाव पनि बढेकाले खानेपानी आयोजनाको संरचनामा क्षति पुग्नबाट रोक्न पानी बन्द गर्नुपरेको केयूकेएलको भनाई छ ।

केही दिनपहिले पनि वर्षा हुँदा केयूकेएलले पानी वितरण बन्द गरेको थियो । क्षेत्रपाटी, महांकाल, भक्तपुर, मध्यपुर ठिमी, त्रिपुरेश्वर, बानेश्वर, कीर्तिपुर, महाराजगन्ज र ललितपुर गरी नौवटा शाखाबाट पानी वितरण हुने गरेको छ ।