काठमाडाैं ।तेस्रो ‘केपी ओली कप’ पुरुष फुटबल च्याम्पियनसिपको उपाधि मच्छिन्द्र फुटबल क्लबले जितेको छ । आज त्रिपुरेश्वरस्थित दशरथ रंगशालामा भएको फाइनल खेलमा त्रिभुवन आर्मी क्लबलाई २–० ले हराउँदै मच्छिन्द्रले लगातार तेस्रो पटक(ह्याट्रिक) उपाधि हात पारेको हो ।
मच्छिन्द्रले खेलको पहिलो हाफमै अग्रता लिएको थियो । खेलको २९औं मिनेटमा एन्ड्रेस नियाको पासमा आर्मीका विमल पाण्डेले आफ्नै पोस्टमा आत्मघाती गोल गरेपछि मच्छिन्द्रले १–० को अग्रता बनायो । दोस्रो हाफमा पनि मच्छिन्द्रले खेलमा पकड कायमै राख्यो। ७२औं मिनेटमा स्टेफाने जालीले गोल गर्दै टिमको जित सुनिश्चित गरे ।
मच्छिन्द्रले यसअघि पहिलो संस्करणमा सातदोबाटो युथ क्लबलाई टाइब्रेकरमा ५–३ ले पराजित गर्दै उपाधि जितेको थियो । दोस्रो संस्करणमा पनि मच्छिन्द्रले न्यूरोड टिम (एनआरटी) लाई टाइब्रेकरमा ५–४ ले हराउँदै उपाधि जितेको थियो । यो जितसँगै मच्छिन्द्र फुटबल क्लब केपी ओली कपको ह्याट्रिक च्याम्पियन बन्न सफल भएको छ ।
फाइनल खेल हेर्न प्रधानमन्त्री केपी शर्मा ओली श्रीमती राधिका शाक्यका साथमा रंगशाला पुगेका थिए । खेलको विशेष अतिथिका रूपमा इटालियन फुटबल टोलीका पूर्व कप्तान तथा गोलरक्षक जियानलुइजी बुफोन उपस्थित थिए । खेलअघि कलाकारहरूले सांगीतिक प्रस्तुति दिएका थिए । राष्ट्रिय युवा संघ नेपालको आयोजनामा केपी ओली कप यही फागुन ११ गतेदेखि सुरु भएको थियो ।
प्रतिक्रिया