एमालेको मूल नेतृत्व विदेशी अनुदान प्राप्त संस्थाबाट पूर्णतः अलग छ : महासचिव पोखरेल

काठमाडौं । नेकपा एमालेका महासचिव शंकर पोखरेलले एमालेको मूल नेतृत्व विदेशी अनुदान प्राप्त संस्थाबाट पूर्णतः अलग रहेको बताएका छन् ।

नेपालमा सञ्चालित गैरसरकारी संस्था अधिकांश एमालेसँग सम्बन्धित रहेको भनेर प्रचार भएको प्रचार तथ्यभन्दा फरक रहेको बताउँदै उनले यस्तो बताएका हुन् ।

उनले भने–नेपालमा सञ्चालित गैर सरकारी संस्था अधिकांश नेकपा(एमाले)संग संवन्धित रहेको भनेर प्रचार हुने गरेको छ । त्यसमा अझ नेताहरुको संलग्नता रहेको भनेर प्रचार गर्ने गरिएको छ । जबकी तथ्य त्यो भन्दा निकै फरक छ ।

बालबालिकाको क्षेत्रमा काम गर्नुहुने मानव अधिकार अभियन्ता गौरी प्रधानले एउटा प्रसंगमा भन्नु भएको सन्दर्भ मलाई यति वेला संझना भइरहेको छ ।

उहाँले भन्नु भएको थियोः मानव अधिकार एलाइन्ससंग सम्वध्द संस्थाहरुले विदेशवाट गैर सरकारी संस्थाले प्राप्त गर्ने अनुदानको १५ प्रतिशत हिस्सा पनि प्राप्त गर्दैनन् । तर पनि एलाइन्समा आवध्दहरु आखाको तारो बन्ने गरेका छन् । किनकी उनिहरु पारदर्शी रुपमा समुदायमा काम गर्दछन् ।

तर, ८५ प्रतिसत भन्दा वढि अनुदान प्राप्त गर्नेहरु खासै चर्चामा छैनन् । किनकी उनीहरु मध्ये अधिकांश वन्द कोठामा काम गर्दछन् । उनिहरु के गर्दछन् आम मानिसलाई थाह पनि हुँदैन ।

मलाई लाग्दछ सत्य यस्तै होला । जहासम्म नेकपा (एमाले)को मुल नेतृत्वको कुरा त्यो विदेशी अनुदान प्राप्त संस्थाबाट पूर्णतः अलग रहदै आएको छ ।