आमाकाे हत्या आराेपमा छाेरा पक्राउ

काठमाडाै । काभ्रेकाे राेशी गाउँपालिका–३ भञ्ज्याङगाउँ बस्ने ६९ वर्षीया माइली लामाको हत्या आरोपमा प्रहरीले २८ वर्षीय छोरा फुर्साङ लामालाई पक्राउ गरेको छ । कात्तिक १६ गते अपराह्न सवा ४ बजे माइली आफ्नो घरको भान्सामा मृत फेला परेकी थिइन् ।

उनी मृत फेला परेको खबरपछि इलाका प्रहरी कार्यालय मंगलटार र जिल्ला प्रहरी कार्यालय काभ्रेबाट टोली खटिएर अनुसन्धान थालेको थियो । तालिम प्राप्त कुकुर पनि खटाएर अनुसन्धान गरेर प्रहरीले तत्कालै मृतकका कान्छा छोरा फुर्साङलाई पक्राउ गरी सोधपुछ थालेको जिल्ला प्रहरी कार्यालय काभ्रेका डिएसपी मिनबहादुर घलेले जानकारी दिए ।

फुर्साङले कोठामा सुतिरहेकी आमाको सुनको रिङ र नगदको लोभले सिलौटोले हानेर अचेत बनाएको प्रहरीले जनाएको छ । अचेत बनेकी आमालाई पुनः आग्लो प्रहार गरी हत्या गरेको आरोप उनीमाथि छ ।

घटनापछि उनी सुनको रिङ र नगद लिएर फरार भएका थिए । उनलाई आइतबार प्रहरीले पक्राउ गरेको हो ।

प्रहरीले घटनाबारे थप अनुसन्धान गर्न जिल्ला अदालतबाट ७ दिन हिरासतमा राख्न अनुमति पाएको छ ।