सर्लाही । वेदेशबाट फर्केलगत्तै एक युवकले आफ्नै श्रीमतीमाथि गाेली प्रहार गरेका छन् ।
सर्लाहीको हरिपूर्वाका एक युवकले हिजाे राति गोली हानेर श्रीमतीको हत्या गरेका हुन् । गए राति पौने २ बजेतिर हरिपूर्वा नगरपालिका– ५ का २७ वर्षीय धिरेन्द्र यादवले आफ्नी २३ वर्षीया श्रीमती चित्रलेखा यादवमाथि गाेली प्रहार उनकाे ज्गोयान गएकाे जिल्ला प्रहरी कार्यालय सर्लाहीले जानाएकाे छ । छोराले प्रहार गरेको गोली लागेर युवकका बुवा समेत घाइते भएका छन् ।
टाउको र आँखामा दुई गोली लागेकी चित्रलेखाको घटनास्थलमै मृत्यु भएको अवस्थामा शव फेला परेको जिल्ला प्रहरी कार्यालय सर्लाहीका डीएसपी दीपक श्रेष्ठले जानकारी दिएका छन् । हातको कुइँनामा गोली लागेर धिरेन्द्रका बुवा ५४ वर्षीय रामदिनेश यादव घाइते छन् । उनको प्रादेशिक अस्पताल मलंगवामा उपचार भइरहेको छ ।
धिरेन्द्र एक महिनाअघि मात्रै कुवेतको वैदेशिक रोजगारीबाट फर्किएको खुलेको प्रहरीले जनाएको छ ।
पत्नीको हत्याको कारण भने खुलिसकेको छैन । हत्यापछि फरार उनको खोजी कार्य तिव्र बनाईएकाे छ । प्रहरीका अनुसार कुवेतबाट फर्किएदेखि नै धिरेन्द्रले पत्नीसँग झगडा गर्दै आएका थिए । विदेशबाट आएपछि २÷३ दिन बसेर उनी भारत गएका थिए । त्यसयता घर नफर्किएका उनी गए राति मोटरसाइकलमा एक जनालाई साथमा लिएर घर आएको पाइएको प्रहरीले जनाएको छ ।
बुहारीमाथि गोली प्रहार हुन थालेपछि छुट्याउने क्रममा ससुरालाई पनि गोली लागेको अनुमान प्रहरीको छ । धिरेन्द्र र चित्रलेखाका एक छोरी छन् ।
प्रतिक्रिया