काठमाडौं । कुनै समयमा नेपाली फिल्ममा एकछत्र आफ्नो प्रभुत्व जमाएका अभिनेता राजेश हमाल विगत ४ वर्षदेखि काँचको पर्दाबाट टाढा छन् । आफूले आश गरेका दुई फिल्म ‘बागमती’ र ‘शकुन्तला’ को असफलतापछि फिल्म छनोटमा गम्भीर भएका उनी अब हतारमा फिल्म गरेर फुर्सदमा पछुताउने पक्षमा छैनन् । अहिले उनी आफ्नो भूमिका शक्तिशाली भएको फिल्म कुरेर बसेका छन् ।
चार वर्षदेखि फिल्ममा काम नगरे पनि अभिनेता हमालको व्यस्तता भने उस्तै छ । कोरोना महामारीभन्दा अगाडि उनलाई देश तथा विदेशमा हुने सांस्कृतिक कार्यक्रममा भ्याइनभ्याइ थियो । एपी वान एचडी टेलिभिजनद्वारा सञ्चालित ‘को बन्छ करोडपति’ रियालिटी शोका होस्ट समेत रहेका उनले लकडाउनयता कान्तिपुर टेलिभिजनमा ‘जातको प्रश्न’ नामक टक शो चलाउँदै आएका छन् ।
दर्शकलाई आफ्नो न्यास्रो नहोस् भन्नका लागि उनी फुर्सदको समयमा म्यूजिक भिडियोमा पनि अभिनय गरिरहेका हुन्छन् । लकडाउन र निषेधाज्ञामा मात्र आफूलाई एक दर्जनभन्दा बढी म्यूजिक भिडियोबाट अफर आएको हमाल सुनाउँछन् । अहिले दर्शकले फिल्म हेर्न नपाएका कारण आफूले केही समयको ग्यापमा म्यूजिक भिडियोमा काम गर्ने सोच बनाएको उनको भनाई छ ।
कोरोना संक्रमण नियन्त्रणभन्दा बाहिर गएकाले तत्काल सिनेमा हल खोल्नु उचित नहुने पनि अभिनेता हमालले बताएका छन् । तत्काल सिनेमा हल खोलेको अवस्थामा भोलीका दिनमा आउने समस्याको बारेमा पनि गम्भीर भएर सोच्नुपर्ने उनको सुझाव छ ।
अभिनेता हमालले कोरोना महामारीपछि आफ्नै निर्देशनमा फिल्म बनाउने पनि बताएका छन् । अहिले फिल्मको प्रि–प्रोडक्सनको काम भइरहेको उनले बताए । फिल्ममा हमाल स्वयंको अभिनय रहनेछ । यो फिल्मभन्दा अगाडि उनी केही म्यूजिक भिडियोमा काम गर्ने योजनामा छन् । उनले आइतवार ‘जुनमा हेरुँ तिमीलाई’ बोलको गीतको म्यूजिक भिडियोको छायांकन सकाएका छन् ।

तपाईको प्रतिक्रिया

RELATED POSTS